ХАЛЫҚАРАЛЫҚ ҚҰҚЫҚ ЖӘНЕ САЛЫСТЫРМАЛЫ ҚҰҚЫҚТАНУ
Сингапурдағы ойын бизнесі туралы заңнаманың ерекшеліктері: Қазақстан Республикасымен салыстырмалы-құқықтық талдау
Кілт сөздер:
ойын бизнесі, құмар ойындар, салыстырмалы-құқықтық талдау, Сингапур заңнамасы, ойынға тәуелділік, зиянды азайту.Аңдатпа
Зерттеудің мақсаты Қазақстан Республикасы мен Сингапурдағы ойын бизнесін құқықтық реттеудің заңнамалық модельдеріне салыстырмалы-құқықтық талдау жүргізу және олардың тәсілдері, қағидаттары мен бақылау тетіктеріндегі негізгі айырмашылықтарды айқындау болды. Зерттеу әдіснамасы зерттелетін елдердің негізгі заңдарының мазмұнына салыстырмалы-құқықтық, жүйелік және формальды-заңдық талдау жүргізуді қамтиды. Ойын бизнесі саласындағы құқықтық реттеудің мақсаттары, уәкілетті органдардың өкілеттіктері және мемлекеттік бақылау тетіктері талданды. Қазақстан Республикасының заңнамасы аумақтық шектеулер моделіне және рұқсат етілген қызмет түрлерін егжей-тегжейлі реттеуге негізделген, сонымен қатар интернет-казинолардың қызметіне және лицензиясыз шетелдік операторлардың қызметіне тыйым салады. Бұған қарағанда, Сингапурдың реттеу моделі кең қадағалау өкілеттіктеріне ие бірыңғай реттеуші орган құруға және құмар ойындардың әлеуметтік зиянын барынша азайту міндетіне бағдарланған. Лицензиялау мәселелеріне, ойынға тәуелділіктің алдын алуға және жекелеген санаттағы адамдардың құмар ойындарға қатысуына шектеу қоюға ерекше назар аударылған. Реттеу қағидаттарындағы елеулі айырмашылықтар анықталды: Қазақстанда ойын қызметін аумақтық шектеу қағидаты басым болса, Сингапурда бірыңғай реттеушінің қатаң бақылауымен ойындарды жауапты ұйымдастыру қағидаты басым. Сингапур моделі мемлекеттің экономикалық мүдделері мен қоғамдық мүдделерді қорғау арасындағы тепе-теңдікті қамтамасыз етудің неғұрлым кешенді тәсілімен сипатталады.
